2021年3月1日
揀樂器
好多家長都要面對「我想小朋友學音樂，但又唔知咩樂器先啱佢學」嘅問題，其實學咩樂器除咗睇小朋友對咩有興趣，亦都要睇埋佢先天條件嘅，例如佢嘅手型係點樣、牙齒係點樣等等.. 仲要考慮埋小朋友嘅性格添！
一般嚟講，3歲半左右都可以開始俾小朋友開始認真地學樂器，不過就唔係每樣樂器都適合咁細個開始學，好似管樂，如果6歲之前學，可能就要由膠嘅小型size開始，但將來佢要轉返做正統管樂樂器，其實都需要重新適應，因為用氣力度、手指位同fingering 都會有啲唔同。
如果小朋友本身比較好動、創造力豐富，但專注力未可以維持太耐的話，我覺得可以先學敲擊，因為敲擊樂器種類較多，即使只係同一組節奏，用唔同樂器演奏嘅效果，小朋友聽落都會唔同，即使節奏單一，但聲音效果唔同，都可以令小朋友將重覆嘅節奏變得有趣。
如果小朋友專注力較好，性格刻苦，就可以考慮鋼琴或小提琴呢類比較難嘅樂器。不過如果小朋友係左手為主的話，我就唔太建議學鋼琴先，因為唔少鋼琴初學嘅樂譜都係右手為主，更加會令左手為主嘅小朋友覺得困難..
至於管樂，如果小朋友嘴唇較厚，可以選擇中低音嘅銅管樂器，如果身形較大隻，可以考慮次中音號或大號；如果手臂長嘅，可以選擇長號；相反，如果嘴唇較薄，就可以揀高音嘅管樂，例如小號、長笛、單簧管等等，如果牙齒較整齊，就可以諗單簧管或Saxophone；如果手指較長，可以揀長笛，如果手指短就可以揀小號；如果手指頭較圓，就可以揀d open hole 嘅樂器，例如單簧管；如果手指頭較尖，就可以揀d close hole嘅樂器，例如Saxophone...
不過講到尾，無論學咩樂器都好，學音樂本身就係需要勤於練習，就算小朋友先天條件幾match 件樂器都好，後天唔努力，一樣可以半途而廢，未能學有所成。喺小朋友嘅音樂路上，家長嘅支持同鼓勵都好重要㗎！
